Multiskala visualisering og studie av CO2 lagring i porøse medie

Karbonfangst og lagring (CCS) er ein teknologi som kan medverke til reduserte klimagassutslepp, som er eit uttalt mål frå verdas politiske leiarar. Klimagassen karbondioksid (CO₂) er ein drivhusgass som bidrar til global oppvarming og klimaendringar. Formålet med CCS er å redusere utslepp av CO₂ til atmosfæren ved at CO₂ blir fanga, transportert og lagra trygt i djupe porøse geologiske formasjonar. Geologisk karbonlagring nyttiggjere seg av kjende prinsipp i fleirfasestraum der CO₂ blir mindre mobil over tid grunna ulike lagringsmekanismar.

Visualisering av CO₂-strøyming i porøse bergartar er viktig for å kunne undersøke fangst- og lagringsmekanismar. Gjennom doktorgradsarbeidet er det utvikla laboratoriemetodar som mogleggjer detaljerte undersøkingar av lagringsmekanismar på skala frå mikrometer til meter. 

I doktorgradsarbeidet er det nytta tre ulike avbildingsteknikkar for å visualisere og studere straumen av CO₂ og påfølgjande reaksjonar og prosessar: 1) mikroskop med automatisk avbilding er nytta på mikromodellar for å studere det som skjer på pore-skala (mikrometer), 2) medisinsk avbilding på Haukeland Universitetssjukehus er nytta for å visualisere væskestraum inni ein kjerneprøve, og 3) det nyutvikla FluidFlower-konseptet med automatisk avbilding med digitalkamera er nytta for å fange strøymingsdynamikk på meterskala.

Personalia

Malin Haugen (f. 1987) har mastergrad i reservoarfysikk frå Universitetet i Bergen i 2012. Ho jobba som reservoaringeniør i seks år før ho starta på doktorgrad i reservoarfysikk ved Institutt for Fysikk og Teknologi, Universitetet i Bergen. Doktorgradsarbeidet er finansiert av Noregs forskingsråd gjennom prosjektet “Subsurface Carbonate CO₂ storage and security” og Centre for Sustainable Subsurface Resources. Hovudrettleiar er professor Martin A. Fernø og medrettleiar er Dr. Bergit Brattekås.